08/01/2013 - 08/19/2013

WELCOME TO CALIFORNIA

Hello Mitänand!!

Mr glaubts chum, aber mir meldet eus nach 3 Wuche au wieder mal!! Will mir ez halt imme unterwegs sind und vo eim Ort zum nächste reised, isch es amel chli schwierig eu alli ufem Laufende z'halte! Hend eus ez also endlich mal en Abig frei bhalte zum eu vo all eusne Erlebnis z'verzelle!!:-)) Viel Spass bim lese...&danke fürs inegügsle!;-))

 

1. August - 4. August 2013 - LAS VEGAS

Mir sind 5 Stund Flug vo Honolulu sind mr guet in Las Vegas ahcho..es hett eus aber zerst schier umghaue wills det soooooo heiss isch!! Sind eus ja eich d'Hitz gwöhnt vo Honolulu, aber in Las Vegas isch es 10x so heiss...!! Aber wend ja ned mötzle übers guete Wetter...hend mr nacher ide Schwiz bestimmt nüme!!;-))

Euse ersti Abig in Las Vegas isch de oberhammer gsie!! Mir hend eus alli chic gmacht..&eusi schönste Kleidli uspackt (d'Leandra und d'Miriam hend sogar extra na eis kauft am Namittag!!)..nachdem mr denn alli parat gsie sind, sind mr ines italienischs Restaurant ih eusem Hotel fein go z'Nacht esse..det hend mr denn au na de Patrick troffe, er isch im Moment au na am umreise und zur gliche Ziit in Las Vegas! Mir sind denn nacher z'5te in HAZE Club..das isch de Klub ih eusem Hotel (übrigens, de Name vo eusem Hotel isch ARIA)..schnell hend mr gmerkt, dass jungi guet kleideti Fraue da in Las Vegas sehr beliebt sind...mir sind denn all gratis inecho und hend ned müsse ahstah *jippiii* (de Patrick leider scho...) Mir sind denn im Club direkt empfange worde und sind zunere Lounge bracht worde wo scho alles ufem Tisch parat gstande isch..aso alkoholischi Getränke...mir hend denn gfunde münd ez mal frage wegem zahle vo all dem, will mr wend denn am Schluss ned müsse all euse Batze det liggelaah! Aber so unglaublich wies tönt, es isch ALLES gratis gsie...mir hend chöne so viel drinke wie mir hend welle (was mr denn au gmacht hend...haha!)...leider hett de Patrick ned chöne zu eus id Lounge cho, will das nur für Fraue isch...er isch denn darum wieder zrug is Hotel..! Mir hend de Abig aso in volle Züg gnosse und's wieder mal richtig krache laah!! Isch super mega lässig gsie&händs z'4tä richtig lustig gha!:-)) Nach dem Abig sind mr aber alli richtig dure gsie&sind froh gsie wo mr eusi höche Schueh hend chöne abzieeh&is Bett gheie!!...

Am nächste Tag hend mr denn darum zerst mal müsse uspfuuuuse..kenned ja bestimmt alli "der Tag danach" oder?!;-))) Am Namittag sind mr denn bi eus im Hotel an Pool gläge&hend eus gebräunt! Am Abig sind mr denn ines super schöns Restaurant Namen's "Top of the World" go z'Nacht esse mitem Patrick. Das isch sones Dreh-Restaurant wo mr über ganz Las Vegas gseht!:-) Hend eus richtig d'Büüch vollgschlage&es feins Glas Wii dezue drunke...! Nacher sind mr denn in XS NIGHTCLUB..das isch eine vode beste Klubs da in Las Vegas! Will mier hüt am Pool en Promoter kenne glernt hend, hend mr au ih dem Club ned gross müsse ahstaah&kei Ihtritt zahle...sooo guet!!:-)) Hett das mal aber leider kei Lounge und kei gratis Getränk meh gääh...aber isch glich en tolle Abig gsie mit super Music..&de Club isch wükli de absoluti Wahnsinn!!!!! Isch alles mega mega schön gmacht&dekoriert!:-) Sind aber alli vom Vorabig scho recht dure gsie..&sind denn darum ned ganz so lang bliebe!!

Am Samstig hend mr eus denn alli Hotels ahluege vorgnoo...sind de ganz Strip abgloffe und jedes Hotel go ahgügsle mit de Casinos und allem!:-) Isch also alles uf sini Art sehr ihdrücklich gmacht...aso lohnt sich uf jede Fall di Hotel go ahluege..sind denn im New York New York sogar na uf d'Achterbahn..hett eus aber leider meh de Nacke verspannt..aber Spass hetts glich gmacht!!:-) &selbstverständlich sind mr na is Casino euses Geld go verpülfere...d'Lärry und d'Miri hend ah dene Slot-Maschine ihres Glück probiert...aber leider ned wükli en Gwünn gmacht..! D'Leandra isch mit de Unterstützig vode Lynn go Roulette spiele...sie isch aber leider au nur mit ihrem ihgsetzte Betrag vo $100 wieder usecho...aso kei Verlust aber au kei Gwünn! Januu...mier hends uf jede Fall lustig gfunde und hend das uf jede Fall welle mache wenn mr in Las Vegas sind...isch ja au es MUSS, oder?!:-))

Ah eusem letschte Tag in Las Vegas sind mr denn euses Auto go hole..ab jetzt heisst nemli Auto düüüüse!!:-) Will mrs ned hend chöne laah, hend mr denn churzfristig na es Uprade gmacht...hend gfunde döffed eus scho mal so es tolls Auto leiste!:-)) hihii Mitem Auto hend mr eus denn also uf de Weg gmacht...mir sind denn in Las Vegas na inen Outlet go shoppe..aso natürli hend meh d'Lynn und d'Miri pöstelet..mir hend eus recht zrug ghebet! haha

Nacher hend mr eus  denn uf di langi Fahrt nach San Diego gmacht....

 

4. August - 8. August 2013 - SAN DIEGO

Nachere 7 Stündige Fahrt mit 2 Stunde Stau sind mr am 12ii ide Nacht endlich in San Diego ahchoo! Sind denn grad is Bett gheit&go pfuuse..! Am Mäntig sind mr denn am Morge grad is SeaWorld..isch mega schön gsie..vorallem d'Show mit de Orkas hetts eus mega gfalle!:-)) Hend eich fast de ganz Tag det verbracht...de Park isch grösser gsie als mr denkt hend..aber hett eus uu gfalle..sind denn öpe am 4ii fertig gsie und denn direkt na Mission Beach gfahre! Eusi Reisefüehrerin d'Lynn isch ja vor 3 Jahr bereits in San Diego gsie&hett darum alles scho kennt&eus chöne zeige! Am Mission Beach hend mr denn ali rasch es Powernapping heregleit..zzZZzzzz...richitg schön gsie ide Abigsunne am Strand ligge!! Nacher sind mr det im WaveHouse na go Esse und sind denn au scho zrug is Hotel! Hend im Hotel nachli UNO gspielt und Seich im Chopf gha...uf jede Fall hend mr de ganz Abig glached!!! haha

Am Zischtig sind mr denn de ganz Tag im San Diego Zoo gsie...de isch mega gsie!!! Isch wunderschön gmacht..&es hett Panda-Bäre det...sind sogar 30 Minute ahgstande will mr diä hend welle gseh!! Am Namitag sind mr denn na uf La Jolla...det hend mr eich welle Seehünd go ahluege..d'Lynn hett ebe verzellt, dass bi ihre det amel de ganz Beach volle Seehünd gsie seg..aber leider sinds ned det gsie..vermuetlich sind zu dere Jahresziit ame andere Ort..*oooch*! Janu..viellicht gsehnd mr uf eusere wiitere Reis ame andere Ort mal na..!:-) Nacher sind mr denn na is Horton Plaza go shoppe...d'Miri&Lynn wend nöd mit leere Köffere wieder hei reise!!:-)) Det sind mr denn am Abig au na grad is Kino...eimal meh!!

Am Zischtig hetts denn eimal meh Shopping gheisse...mir sind is Fashion Valley..das isch au so e Shopping-Mall..!:-) Am Abig sind mr denn ines italienisches Restaurant go z'Nacht esse&nacher na öpis go trinke..&Shisha rauche!:-) Hend also en richtig gmüetliche letschte Abig mit eusne zwei Ladys gha..! Am Dunnstig hend mr denn na de Morge in Downtown verbracht und hend denn scho bald d'Miri&Lynn an Flughafe gfahre...*heeeeeul*!! Denn ehtts denn gheisse Bye Bye säge...aber nur für ä churzi Ziit, sind ja scho bald selber ufem Heiweg! Hend die zwei Wuche mit ihne aber mega mega gnosse..&isch richtig schön gsie sie um eus ume haa&so viel schöni Sache chöne zäme erlebe!! Danke viel mal dene zwei für di tolli Ziit...mir wäred eu vermisse!!!!!!!:-((((

Wieder uf eus allei gstellt hend mr denn di letscht Nacht na allei im Zimmer in San Diego verbracht...am Fritig Morge hetts denn gheisse back nach Las Vegas..!

 

8. August - 11. August 2013 - LAS VEGAS

Mir sind ned zrug na Las Vegas will eus di 6 Stund Fahrt so guet gfalled...neii...mier hend unbedingt na welle de Grand Canyon go ahluege..&leider z'wenig Ziit gha vorher!! Am Fritig Mittag sind mr denn in Las Vegas ahcho und den Namitag na am Pool verbracht...! Am Abig sind mr denn Cirque du Soleil go luege..isch e mega tolli Show mit absolut ihdrückliche Bühnebilder!!!:-)) Am Samstigmorge sind mr denn vo eusem Shuttle abgholt worde für de Grand Canyon...mir sind mitem Helikopter direkt in Canyon inegfloge! Isch mega schön gsie alles chöne vo obe ahluege&sogar chöne im Canyon ine lande!! Det hend mr denn es chlieses Picknick becho...&all di faszinierende Ihdrück chöne gnüsse!! Isch aso es mega Erlebnis gsie mitem Heli chöne det here flüüge...hett sich definitiv glohnt!:-) Am Abig sind mr denn fein go z'Nacht esse...&nacher in Hakkasan Club de Tiesto go lose!!!! Das isch eine vode bekanntiste DJ's..&ihn hend mr eus definitiv ned welle entgaah lah...isch mega gsie!!!:-))) Jaa...es hett sich also definitiv glohnt nomal zrug nach Las Vegas cho...gfallt eus richtig guet daa!!:-))

 

11. August - 15. August 2013 - LOS ANGELES

Am Sunntig morge hetts denn gheisse Wiiterfahrt nach Los Angeles..nach chli meh als 5 Stund Fahrt sindmr denn ahchoo..! Am Abig sind mr denn (wieder mal nach laaanger Ziit..) id Cheesecake Factory go z'Nacht esse!:-) Nach dem guete z'Nacht hend mr nanig welle go pfuuse..darum sind mr denn na is Kino..hend aber ned gmerkt, dass das es speziells Kino isch...und zwar isch das es Dine-In Cinema wo mr chan z'Nacht esse! Leider hend mr ja scho gesse gha..darum münd mr unbedingt nomal gaah&da esse!! Isch ja ned so als währed mr ned scho gnueg im Kino gsie, gell?! hahaha

De Mäntig hend mr ide Universal Studios verbracht...hett eus aber ned wükli überzoge...aso es isch scho lässig gmacht&ihdrücklich mal so Kullisene gseh&alles...aber für de Priis ($80/Person) isch ned wükli viel boote..hett au kei Achterbahne sondern nur so 3 oder 4D Kinos wo eus sowieso ned so gfalled..sind also bizeli enttüscht gsie! Januu..hends s'beste drus gmacht..! Ahja, es chlises Misgschick isch eus det au na passiert...d'Larissa hett ihres Portemonnaie vergesse und d'Leandra hett kei Bargeld meh gha...d'Lärry hett denn en Bretzel welle und wo d'Leandra hett welle zahle isch leider ihri Kredikarte nüme gange!!!! Uuuups...mir hend denn ahgfange all euses Münz zemmesammle demit mr de Bretzel hend chöne zahle..will d'Larissa scho driibisse hett isch nemli au mit zruggäh nüt meh worde...haha..nachdem mr öpe 5 Minute euses Geld zemekraamt hend, hett d'Kassiererind denn gseit es seg ok mir chöngeds sii laah...hend denn also ned müsse zahle...isch eus aber gar ned wohl  gsie! Das hett aber au gheisse, dass mr bis mr zrug sind nüt meh chönd poste..hend eus denn also hungrig&durstig welle uf de Heiweg mache...aber so wie Fraue halt sind...hend mr nüme gwüsst wo mr s'Auto parkiert hend...hend denn also im 1. Stock une ahgfange und hend Stockwerk für Stockwerk abgsuecht...ja wie mr sich chan vorstelle, isch s'Auto denn im oberste 6. Stock gsie...aiaiaiii...hend eus selber denn rasch müsse uslache..&hend eus denn  aber schnell uf de Heiweg gmacht! Am spötere Namitag sind mr denn na an Venice Beach..&det nachli de Promenade entlang gloffe..det hetts so richtig typisch en Muscle Beach  wo mr ufpumpti Manne obe ohen gseht am trainiere..haha...sehr witzig gsie! &au suscht isch de Weg am Venice Beach sehr witzig gmacht mit all dene chline Lädeli..&es hett sehr viel kurligi Lüüt det..aber das sind mr eus ja langsam gwöhnt! Was mr leider ned gseh hend, sind diä Fraue ide Short wo am Rollerblade sind...so wie mrs ide  Film immer gseht...aber janu!:-) Am Abig sind mr denn an Santa Monica Pier go z'Nacht esse...das isch richtig schön gmacht det&hett au so Lädeli und sogar es restaurierts Karussell und suscht na paar so Bahne..!:-)

Am Zischtig Morge sind mr denn im Mel's Drive In in Hollywood go z'Mörgele..das isch sones typisches amerikanisches ihgrichtets Restaurant..nacher sind mr denn grad Beverly Hills&de Rodeo Drive go ahluege..&sind denn efach na de Hügel uf gfahre..immer de Villene naah...&det denn grad na s'Hollywood Sign go ahluege!:-)) Münd also scho sege, di Promis da lebed also definitiv ned schlecht...isch wunderschön uf dem Hügel&hett also sehr schöni Hüsli daa wo sich's sicher guet lebe laht!:-) hihii Am Abig sind mr denn also wie gseit nomals is Dine-In Cinema..aber das mal natürli go z'Nacht esse..!:-)) s'beste ah dem Kino isch aber, dass mr chan Popkorn jederziit wieder uffülle laaah!! *jeeeeeh*...was gits bessers für so zwei Popkorn-Liebhaber wie mier zwei!xD hend also en perfekte Abig im Kino verbracht!!:-))))

Am Mittwuch ich den de Six Flags Park ufem Programm gstande..das isch so en Park wie de Europapark..mit alles so Achterbahne&allem mögliche!:-) Mier hend aber nach de zweite Bahn aber schnell gmerkt, dass mr das gerumpel au nüme so guet verträäged wie vor 10 Jahr..!! haha sind amel froh gsie wenn die Fahrte ume gsie sind&mier us dene Bähndli hend chöne...!! Hend eus aber dur di 5 beste Bahne kämpft und die gmacht!! Richtig stolz sind mr gsie...nacher hend mr aber müsse ufgääh..suscht wers denn ned guet cho!! hehe Ahh..&hend sogar öpis glernt us eusem Dilemma-Parking vor zwei Täg..hend das mal es Foti gmacht vo eusem Standort vom Auto..hend das mal aso au euses Auto schnell wieder gfunde!!!:-))) Olééé...!! haha Am Abig sind mr denn im Zimmer bliebe und hend eusi Köffere neu packt und alles wieder mal chli ufgruumt...

 

15. August 2013 - NEWPORT

Mier hend eus entschiede, will mr so viel Ziit hend, zerst nachli abwärts Fahre und sind darum nach Newport und hend det na 1 Nacht verbracht! Sind ufem Highway 1 abegfahre..aso alles de Küste entlang..&sind ah wunderschöne Stränd verbiigfahre&hend teilwiis au ahghalte...Manhatten Beach...Seal Beach...Sunset Beach...Hunington Beach (det hend mr sogar na Delfin gseh!!)...Laguna Beach...&Newport Beach...!! Hett also wükli sehr schöni Stränd wo sich's uf jede Fall wür lohne ahhalte..!:-) Am Abig sind mr denn in Newport na fein go z'Nacht esse..!!:-

 

16. August - 18. August  2013 - SANTA BARBARA

Die nächste 3 Täg hend mr in Santa Barbara verbracht..! D'Farht vo Newport nach Santa Barbara isch aber au wunderschön gsie...alles wieder am Highway 1 de Küste entlang..!! Isch aber leider teilwiis sehr bewölkt gsie..darum hett mr amel ned so schön uf s'Meer use gseh...aber isch glich sehr schön det chöne entlang faahre!:-) in Santa Barbara ahcho sind mr denn det am Nami nachli an Strand gläge&hend d'Sunne gnosse! Am Abig sind mr denn ad State-Street go z'Nacht esse..das isch eich d'Hauptstrass vo Santa Barbara...&isch wükli absolut schön!!! Santa Barbara isch so chli im südeuropäische Stil errichtet..aso erinneret sehr ah Spanie&Italie...&es isch es super schöns Ambiente det wo mr sich grad wohl fühlt...&richtig in Feriestimmig chunt!!:-)) Isch eusere Meinig nah, eine vode schönste Orte wo mr ade West Coast bis ez gseh hend..!:-)) &es laht sich definitiv au seeeehr guet shoppe daa...hend wieder mal richtig vollgas gääh..aber es hett efach so tolli Läde daa wo mr als Frau efach ned chan nei säge!!! Tztztzz...!:-)) Hend di 3 Täg aso grössteteilts ide State-Street verbracht...&sind au na an Pier füre wos au sehr schön isch...&an Beach!:-) &wie ihr eu chönd vorstelle...natürli au is Kino!!! hahaha

Aso Santa Barbara hett alles was mr bruucht zum schön Ferie mache...!:-)

 

19. August 2013 - SANTA CRUZ

Am Mäntigmorge hend mr eus denn uf de Weg nach Santa Cruz gmacht..!  Mier hend öpe 6 Stund gha..&natürli wieder alles de Coast nah gfahre!:-) Isch e wunderschöni Fahrt gsie de Küste entlang...hend absolut beidruckendi Stränd und Klippe gseh und öpe mal ahghalte zum die schön Ussicht gnüsse&festhalte!:-) Isch teilwiis aber leider immer biz bewölkt gsie..aber hend glich hi und da es Örtli gfunde wo d'Sunne gschiint hett...! Und hend sogar na Seeelefante gseeeeh....das sind die riesegrosse fette Robbe oder ebe Seeelefante wo immer fuuul am Strand ligged!!!:-)) Isch recht witzig gsie...&isch schön so Tier chöne beobachte ide freie Natuur!:-)) Sind denn ufem wiitere Weg na en feine Salat go esse..sind z'mitzt im Wald inegsesse umgääh vo Bäum...isch mega schön gsie! hehe

In Santa Cruz ahcho hend mr denn nüme viel gmacht...isch leider au ned so tolls Wetter gsie&sind darum denn im Hotelzimmer bliebe..tut eus ja au mal guet wenn mr chli chönd abefaaahre!;-)) &hend denn Santa Cruz am nächste Morge bevor mr wiitergfahre sind na chli ahluegt..hett det so en Boardwalk wos au so chlini Bahne und Karussell hett&soo..direkt am Strand..!:-)) und sind mitem Auto efach na bizeli dur s'Städli düüüsed..isch alles chli verträumt da hend mr gfunde..aber passt alles so da here wies isch!:-)

Nacher hend mr eus denn uf d'Fahrt nach San Francisco gmacht...uf dem Weg hend mr wieder unglaublich schöni Ort gseh wo mr am liebste bliebe währed!! Hend nach Santa Cruz eigentlich na en Ort gsuecht wo mr ime Film gseh hend...Chasing Mavericks...das isch en Surferfilm wo mr in Kauai mit de Lynn&Miri gluegt hend...det hends so riese  Welle zeigt wo bis zu 25 Meter höch sind...&di hend mr eich welle go ahluege...leider hend mr de Ort aber ned wükli gfunde..&sind denn darum efach na anen Beach gläge..hend denn aber gmerkt, dass die Welle ah dem Strand au recht höch sind..teilwiis sicher bis zu 5 Meter höch..&es sind denn sogar na es paar Surfer choo! Sind denn 2 Stunde am Strand gläge&hend dene Surfer zuegluegt...isch recht beeidruckend was für riese Welle die schaffed...oder wenns es amel au ned schaffed, wie dass es verrüert!! &hend sogar na Delfin gseh wo wenigi Meter hinder de Surfer duregschwumme sind...efach mega gsie das alles z'gseh!:-)) Isch eus denn aber irgenwenn z'chalt worde, wills au det recht bewölkt gsie isch und s'gwindet hett..!! Also ez ab nach San Francisco...

 

Sooo das wers gsie vo eusne erste knapp 3 Wuche ade West Coast!:-)) Mier erlebed mega viel schöni Sache daa...&gsehnd so viel schöni Ort&Stränd wo efach nur wunderschön sind! Sind also richtig beidruckt vo all dene Ort und gfallt eus mega mega guet daa..&hoffed mir gsehnd&erlebed na me so tolli Sache!!:-))

 

Danke eu allne viel mal fürs inegügsle&mitlese!!:-) Hoffed ihr chönd so chli ah eusne Erlebnis teil haa!

Wünsched eu e super Ziit...&mir werded eus bestimmt am Endi vo eusem Trip nomal melde zum na alles verzelle was ez na vo eus staaaht!!:-))) Bis bald&macheds guet!

 

Grüässli vode wunderschöne West Coast

Larissa&Leandra

 

PS: d'Föteli folged denn na ide nächste paar Tääg...!:-))